កម្ពុជាពុំមែនជាប្រភពចម្លង COVID-១៩ ទេ ករណីដែលផ្ទុះឡើងសុទ្ធតែត្រូវបាន “នាំចូល” ដោយជនបរទេស

កម្ពុជាបានផ្ទុះ COVID-១៩ ករណីទី៣បន្ទាប់ពីមានភ្ញៀវទេសចរជនជាតិអង់គ្លេសម្នាក់នៅខេត្តកំពង់ចាមត្រូវបានរកឃើញថាបានឆ្លងជំងឺ COVID-១៩។

បន្ទាប់ពីរដ្ឋមន្ត្រីក្រសួងសុខាភិបាលលោក ម៉ម ប៊ុនហេង បានប្រកាសជាផ្លូវការនៅក្នុងសន្និសីទសារព័ត៌មានកាលពីយប់ថ្ងៃទី១០ ខែមីនា ឆ្នាំ២០២០ថា កម្ពុជារកឃើញករណីឆ្លងជំងឺកូរ៉ូណា (COVID-១៩) លើភ្ញៀវទេសចរដែលជាស្ត្រីជនជាតិអង់គ្លេសអាយុ ៦៥ ឆ្នាំនៅខេត្តកំពង់ចាមមក បានបង្កឱ្យមានការភិតភ័យយ៉ាងខ្លាំងដល់ប្រជាពលរដ្ឋកម្ពុជា ជាពិសេសប្រជាពលរដ្ឋដែលរស់នៅក្នុងខេត្តកំពង់ចាមផ្ទាល់តែម្តង។

ទោះយ៉ាងណា អ្នកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាលកម្ពុជាបានថ្លែងនៅក្នុងសន្និសីទនេះថា ថ្វីត្បិតតែកម្ពុជាផ្ទុះករណីទី៣នៃ COVID-១៩ ពិតមែន ប៉ុន្តែករណីថ្មីនេះមិនមែនឆ្លងនៅក្នុងទឹកដីកម្ពុជានោះទេ ជាក់ស្តែងគឺឆ្លងពីប្រទេសវៀតណាម។ រហូតមកដល់បច្ចុប្បន្ននេះ ករណី COVID-១៩ នៅកម្ពុជាសុទ្ធតែត្រូវបាន “នាំចូល” តាមរយៈជនជាតិបរទេសទាំងអស់ កម្ពុជាពុំទាន់ក្លាយជាតំបន់នៃប្រភពចម្លង COVID-១៩ នោះឡើយ ហើយក៏ពុំមានការឆ្លងរាលដាលដល់សហគមន៍ណាមួយដែរ។

ដោយសារតែករណី COVID-១៩ ទី៣នេះបានផ្ទុះឡើងនៅក្នុងទឹកដីខេត្តកំពង់ចាម រដ្ឋបាលខេត្តកំពង់ចាម​បានផ្ញើសារប្រាប់ពលរដ្ឋ​កុំឱ្យភិតភ័យ​ចំពោះការរកឃើញ COVID-១៩ ករណីទី៣លើនាវាទេសចរណ៍ដែលចូលចតនៅខេត្តកំពង់ចាមនេះ ដោយសាលាខេត្តកំពង់ចាមបានបញ្ជាក់ថា៖

១. ភ្ញៀវទេសចរជនជាតិអង់គ្លេសនោះមិនមែនឆ្លងជម្ងឺ COVID-១៩ ក្នុងប្រទេសកម្ពុជាទេ​ គាត់ឆ្លងពេលគាត់នៅលើយន្តហោះក្នុងពេលធ្វើដំណើរ​ពីប្រទេសរបស់គាត់មកកាន់ប្រទេសវៀតណាម។

២. ស្ត្រីជនជាតិអង់គ្លេសរូបនេះស្នាក់នៅលើនាវាទេសចរណ៍​ មិនបានចុះមកលើគោកទេ ជាពិសេសគាត់​ស្នាក់នៅក្នុងបន្ទប់ដាច់ដោយឡែកតែម្នាក់ឯង​ មិនបាន​នៅលាយឡំជាមួយភ្ញៀវទេសចរដទៃទៀតទេ។

៣. បច្ចុប្បន្នគាត់បាននិងកំពុងតែត្រូវបានពិនិត្យព្យាបាលដោយយកចិត្តទុកដោយក្រុមគ្រូពេទ្យជំនាញរបស់មន្ទីរសុខាភិបាលខេត្តកំពង់ចាមក្នុងបន្ទប់ដាច់ដោយឡែកនៅក្នុងមន្ទីរពេទ្យបង្អែកខេត្តកំពង់ចាម។

ស្ត្រីជនជាតិអង់គ្លេសខាងលើបានធ្វើដំណើរតាម​នាវាទេសចរណ៍ឈ្មោះ​ Viking Cruise Journey ចេញពីកំពង់ផែ ម៉ៃថូ ទីក្រុង​ហូជីម៉ិញ ដោយបានធ្វើដំណើរតាមច្រកក្អមសំណរមកកាន់កម្ពុជា ហើយបានចូលចតនៅរាជធានីភ្នំពេញមុននឹងបន្តដំណើរនិងចូលចតនៅខេត្តកំពង់ចាម។

ក្រោយបានទទួលដំណឹងពីខាងភាគីវៀតណាមថា ស្ត្រីជនជាតិអង់គ្លេសរូបនេះបានធ្វើដំណើរតាមជើងយន្តហោះ VN ០៣៤ ដោយអង្គុយជាប់នឹងជនជាតិវៀតណាមម្នាក់ដែលឆ្លងជំងឺ COVID-១៩ ក្រសួងសុខាភិបាលកម្ពុជាក៏បានចាត់បញ្ជូនមន្ត្រីជំនាញដើម្បីស្វែងរកនិងធ្វើតេស្តទៅលើស្ត្រីជនជាតិអង់គ្លេសរូបនេះ។ វិទ្យាស្ថានប៉ាស្ទ័រកម្ពុជាបានប្រកាសលទ្ធផលធ្វើតេស្តលើស្ត្រីជនជាតិអង់គ្លេសនេះនៅម៉ោង ៤ និង ៣០ នាទី​រសៀល ថ្ងៃទី​១០​ ខែ​មីនា ឆ្នាំ២០២០។ ក្រុមមន្ត្រីជំនាញក្រសួងសុខាភិបាលក៏បានចុះទៅខេត្តកំពង់ចាមដើម្បីតាមដានស្ថានភាពវិវឌ្ឈនៃជំងឺនេះតាំងពីល្ងាចថ្ងៃទី១០ ខែមីនា ឆ្នាំ២០២០។

ទន្ទឹមនឹងនេះ ក្រសួងសុខាភិបាលក៏នឹងយកសំណាករបស់អ្នកដំណើរលើនាវាសរុបទាំងអស់ ៦៥នាក់ រួមទាំងនាវិកផងដែរដើម្បីស្វែងរក COVID-១៩។

តាមព័ត៌មានបានឱ្យដឹងថា នាវានោះបានចាកចេញពីទីក្រុងហូជីម៉ិញកាលពីថ្ងៃទី៥ ខែមីនា ឆ្នាំ២០២០ និងបានមកដល់រាជធានីភ្នំពេញកាលពីថ្ងៃទី៧ ខែមីនា ឆ្នាំ២០២០។ ក្រសួងសុខាភិបាលកំពុងស្វែងរកព័ត៌មានបន្ថែមពីការធ្វើដំណើររបស់ក្រុមទេសចរទាំង ៦៤ នាក់ខណៈពេលដែលពួកគាត់ចូលចតនៅរាជធានីភ្នំពេញមុនពេលចាកចេញតាមនាវាដដែល​ទៅខេត្តកំពង់ចាម ក្នុងនោះបូករួមទាំងអ្នកបកប្រែដែលជាស្ត្រីជនជាតិខ្មែរម្នាក់ផងដែរ។

ទោះយ៉ាងណា បើតាមលោក ម៉ម ប៊ុនហេង រដ្ឋ​មន្ត្រី​ក្រសួង​សុខាភិបាលបានបញ្ជាក់ថា​ អ្នកដំណើរទាំងអស់នៅលើនាវានោះមិនត្រូវបានអនុញ្ញាតឱ្យចាកចេញពីនាវានោះទេ លើកលែងតែស្ត្រីជនជាតិអង់គ្លេសដែលមានវិជ្ជមាន COVID-១៩ ដែលត្រូវបានបញ្ជូនទៅមន្ទីរពេទ្យបង្អែកខេត្តកំពង់ចាមដើម្បីធ្វើការព្យាបាលដាច់ដោយឡែក។ លោកក៏បានបញ្ជាក់ថា អាជ្ញាធរខេត្តកំពង់និងស្ថាប័នពាក់ព័ន្ធកំពុងតែធ្វើការយ៉ាងតឹងរ៉ឹងលើនាវាខាងលើ ដោយមិនអនុញ្ញាតិឱ្យភ្ញៀវទេសចរលើនាវានោះណាម្នាក់ចាកចេញពីនាវាឡើយ ហើយក៏មិនអនុញ្ញាតឱ្យអ្នកដែលមិនជាប់ពាក់ព័ន្ធឬគ្មានភារកិច្ចចូលទៅក្នុងនាវានោះដែរ។

គួររម្លឹកថា នេះជាករណីទី៣ហើយសម្រាប់កម្ពុជា បន្ទាប់ពីជនជាតិចិននៅខេត្តព្រះសីហនុនិងជនជាតិខ្មែរនៅខេត្តសៀមរាបដែលត្រូវបានរកឃើញថាឆ្លងជំងឺ COVID-១៩៕ ដោយ សុងឈីង

Tagged : /

ក្តៅគគុកនៅអ៊ីរ៉ាក់៖ អាមេរិកវាយសងសឹក​​ក្រុមឧទ្ទាមជិតព្រំដែនស៊ីរី​

ប្រព័ន្ធផ្សព្វផ្សាយ​ជាច្រើន​បានផ្សាយថា ការវាយប្រហារ​បានកើតឡើង​ ទៅលើ​មូលដ្ឋាន​យោធា​អាមេរិក Taji នៅក្នុងប្រទេសអ៊ីរ៉ាក់ ។ ការវាយប្រហារនេះ​សម្លាប់​ទាហាន​៣នាក់ និង​១២នាក់​បានរងរបួស ។

ក្រោយសកម្មភាពនេះភ្លាម កងទ័ព​អាមេរិក​ក៏បានវាយប្រហារ​តាមអាកាស ​ប្រឆាំង​ទៅលើ​ក្រុមឧទ្ទាម​នៅក្នុងទឹកដីអ៊ីរ៉ាក់ ស្ថិតនៅក្នុងខេត្ត Anbar ជិតព្រំដែន​ជាមួយប្រទេសស៊ីរី​នោះវិញផងដែរ ។ នេះបើតាមការផ្សាយរបស់ប្រភព sputnik ថ្ងៃទី១២ ខែមីនា ឆ្នាំ២០២០ ។ 

ប្រភព Sky News Arbabia បានផ្សាយថា ការវាយប្រហារ​នៅលើទឹកដីអ៊ីរ៉ាក់របស់កងកម្លាំងអាមេរិកនេះ ​គឺប្រឆាំង​ទៅលើ​មូលដ្ឋានកងកម្លាំង​ PMF (Popular Mobilization Forces) ។ 

ប្រភពបានបញ្ជាក់ថា «យន្តហោះចម្បាំង​អាមេរិក​បានវាយប្រហារ​តាមអាកាស​ទៅកាន់មូលដ្ឋាន​របស់ពួកជីវពល al-Hashd al-Shaabi ស្ថិតនៅក្នុងភូមិ al-Khuray ខេត្ត Anbar» ។ មិនទាន់មានព័ត៌មាន​ស្តីអំពី​គ្រោះថ្នាក់​បាត់បង់ជីវិត​នៅឡើយទេ។ 

ទីភ្នាក់ងារព័ត៌មាន SANA បានផ្សាយថា ការវាយប្រហារ​របស់អាមេរិក​ បានកើតឡើង​នៅជិត​ប៉ុស្តិ៍​ត្រួតពិនិត្យ​ព្រំដែន​ស៊ីរី​ ជាប់ជាមួយ​អ៊ីរ៉ាក់ ក្នុងតំបន់ Deir ez-Zor ទីក្រុង Abu Kamal ។ សម្ភារ​ខ្លះៗ​បានខូចខាត​ដោយការវាយប្រហារ​នេះ ។ 

នៅពេលមុននេះ, កម្លាំងសម្ពន្ធមិត្ត​ដឹកនាំដោយសហរដ្ឋអាមេរិក​ដែលកំពុងប្រយុទ្ធប្រឆាំង​​ទៅលើ​ក្រុម​ភេរវកម្ម Daeshនោះ​ បានបញ្ជាក់ថា រ៉ុក្កែត​ធុនតូច​ជាង​១៥គ្រាប់​ បានវាយប្រហារ​មកលើមូលដ្ឋានយោធា​Taji នៅក្នុងទឹកដីអាមេរិក ។ មូលដ្ឋាននេះ​ ជាទីតាំងស្ថិតនៅ​របស់កងកម្លាំង​សម្ពន្ធមិត្ត ។ 

ក្រោយពី​សេចក្តីថ្លែងការណ៍បែបនេះ​របស់​កម្លាំងសម្ពន្ធមិត្ត, ប្រព័ន្ធផ្សព្វផ្សាយ​ជាច្រើន​ក៏បាន​ផ្សាយ ដោយដកស្រង់ប្រភព​ពីមន្ត្រីសហរដ្ឋអាមេរិក​មិនបញ្ចេញឈ្មោះ បានបញ្ជាក់ថា យ៉ាងតិច​ពលរដ្ឋអាមេរិក​២នាក់ និង​ពលរដ្ឋ​អង់គ្លេស​ម្នាក់​បានស្លាប់​ក្នុងការវាយប្រហារដោយរ៉ុក្កែត​ទៅលើមូលដ្ឋាន​យោធា​នៅអ៊ីរ៉ាក់ ។ 

ប្រព័ន្ធផ្សព្វផ្សាយ​បន្តថា មនុស្សជាច្រើនផ្សេងទៀត​បានរងរបួស​ដោយសារការវាយប្រហារនេះផងដែរ ។ របាយការណ៍​បឋម​បានបញ្ជាក់ដោយ​អ្នកនាំពាក្យ​កម្លាំងសម្ពន្ធមិត្ត​បញ្ជាក់ថា ទាហាន​​៣នាក់បានស្លាប់ និងប្រហែល​១២នាក់ផ្សេងទៀត​បានរងរបួស ក្នុងការវាយប្រហារនេះ ៕ ប្រែសម្រួលដោយ៖ thach 

Tagged : /

Nadech និង Yaya ត្រៀមទៅជួបជុំអ្នកគាំទ្រនៅប្រទេសហ្វីលីពីន

គូស្នេហ៍តារាសម្ដែងដ៏ផ្អែមល្ហែមប្រចាំទូរទស្សន៍ប៉ុស្តិ៍លេខ ៣ ថៃ Nadech និង Yaya កំពុងត្រៀមខ្លួនជួបជុំអ្នកគាំទ្រជាលើកដំបូងនៅទីក្រុងម៉ានីល ប្រទេសហ្វីលីពីន។

ចំពោះកម្មវិធីជួបជុំរវាងអ្នកគាំទ្រនៅប្រទេសហ្វីលីពីនលើកដំបូងនេះ មានការលក់សំបុត្រទៅតាមប្រភេទទីតាំងនីមួយៗ ដែលមានតាមតម្លៃខុសៗគ្នាដែលបានបែងចែក។

គួរឲ្យដឹងផងដែរថា នេះជាលើកទី១ ហើយដែលតារាសម្ដែងប្រុសស្រីមួយគូនេះ មានកម្មវិធីជួបជុំអ្នកគាំទ្រ ដែលកម្មវិធីនេះនឹងប្រព្រឹត្តឡើងនៅថ្ងៃទី ២៥ ខែមេសា ឆ្នាំ២០២០ នាទីក្រុងម៉ានីល ប្រទេសហ្វីលីពីន។ អ្នកគាំទ្រជាច្រើននៅប្រទេសហ្វីលីពីន រង់ចាំយ៉ាងអន្ទះសារជួបផ្ទាល់នូវវត្តមានគូស្នេហ៍មួយគូនេះនឹងត្រៀមស្វាគមន៍ចំពោះការធ្វើដំណើរមកកាន់ទឹកដីប្រទេសហ្វីលីពីនជាលើកដំបូង៕ អត្ថបទដោយ៖ ឧស្សហ៍

Tagged : /

សង្ស័យងងុយដេក ជិះទៅបុករថយន្តមួយគ្រឿងទៀតពីក្រោយ គាបជាប់អ្នកបើកបររងរបួសធ្ងន់

រាជធានីភ្នំពេញ ៖ រថយន្តដឹកទំនិញ១គ្រឿង បើកក្នុងល្បឿនលឿន សង្ស័យអ្នកបើកបរងងុយដេក បានជ្រុលទៅបុកពីក្រោយរថយន្តដឹកអង្ករកំពុងឈប់ស្ងៀមពេញទំហឹង បណ្ដាលឲ្យគាបជាប់អ្នកបើកបរនៅក្នុងកាប៊ីនរថយន្ត រងរបួសធ្ងន់។ 

ហេតុការណ៍នេះ បានកើតឡើងកាលពីវេលាម៉ោង៥ទៀបភ្លឺ ថ្ងៃទី១១ ខែមីនា ឆ្នាំ២០២០ នៅតាមវិថីឈ្នះឈ្នះ ត្រង់ចំណុចជិតផ្លូវដែកខ្សែភ្នំពេញ-បាត់ដំបង ស្ថិតក្នុងភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។

ជនរងគ្រោះមិនទាន់ត្រូវបានស្គាល់អត្តសញ្ញាណនៅឡើយទេ ដោយបើកបររថយន្តធុនធំដឹកទំនិញ១គ្រឿង ពណ៌ក្រហម ពាក់ស្លាកលេខ ភ្នំពេញ 3D-5072។ ចំណែករថយន្តដឹកអង្ករដែលឈប់ស្ងៀមនោះម៉ាកនីស្សាន់ឌីសែល ពណ៌ស ពាក់ស្លាកលេខ ព្រះសីហនុ 3A-6633 បើកបរដោយបុរសមិនស្គាល់ឈ្មោះដូចគ្នា ។

តាមប្រភពព័ត៌មានបានឲ្យដឹងថា នៅមុនពេលកើតហេតុ រថយន្តដឹកអង្ករបានធ្វើដំណើរក្នុងទិសដៅពីជើងទៅត្បូង។ លុះពេលទៅដល់ត្រង់ចំណុចកើតហេតុ បានឈប់នៅលើផ្លូវ ហើយអ្នកបើកបរបានចុះទៅគោះមើលកង់ ដោយសង្ស័យថាកង់រថយន្តនោះធ្លាយឬធូរ ។ ស្របពេលនោះ ស្រាប់តែរថយន្តដឹកទំនិញធុនធំខាងលើ បើកបរស្របទិសគ្នាក្នុងល្បឿនលឿន បានទៅដល់ ហើយសង្ស័យអ្នកបើកបរងងុយដេកងោកមួយភាំង ទើបមើលមិនឃើញ ក៏បានបុកពីក្រោយរថយន្តដឹកអង្ករនេះពេញទំហឹង។

ប្រភពដដែលបានបន្តថា គ្រោះថ្នាក់នេះ បណ្ដាលឲ្យរថយន្តដឹកទំនិញខូចខាតកាប៊ីនមុខទាំងស្រុង ហើយគាបជាប់អ្នកបើកបររងរបួសធ្ងន់ធ្ងរ។ បន្ទាប់មកសមត្ថកិច្ចមូលដ្ឋាន បានចុះទៅកន្លែងកើតហេតុ រួចទំនាក់ទំនងទៅកាន់អង្គភាព៧១១ ឲ្យចុះទៅជួយគាស់យកជនរងគ្រោះចេញ និងបញ្ជូនទៅសង្រ្គោះបន្ទាន់ភ្លាមៗ។ ក្រោយមក នគរបាលការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចុះទៅធ្វើការវាស់វែង និងនាំយករថយន្តទាំង២គ្រឿងទៅរក្សាទុក រង់ចាំការដោះស្រាយគ្នានៅពេលក្រោយ៕ សួង សាម

Tagged :

ស្ត្រីអង់គ្លេសម្នាក់ដែលមានវីរុស Covid-19 កំពុងស្ថិតក្នុងការព្យាបាលនៅមន្ទីរពេទ្យខេត្តកំពង់ចាម

ស្រ្តីជនជាតិអង់គ្លេសម្នាក់អាយុ ៦៥ឆ្នាំ ដែលធ្វើដំណើរតាមនាវាពីប្រទេសវៀតណាមមកចូលចតនៅខេត្តកំពង់ចាម ត្រូវបានរកឃើញមានផ្ទុកវីរុស Covid-19 ក្រោយការធ្វើតេស្តនៅមន្ទីររុស្សី នាល្ងាចថ្ងៃទី១០ ខែមីនា នេះ។​ នេះបើតាមការបញ្ជាក់របស់ លោក ម៉ម ប៊ុនហេង រដ្ឋមន្រ្តីក្រសួងសុខាភិបាល ក្នុងសន្និសីទកាសែត នារាត្រីថ្ងៃអង្គារនេះ។

លោក ម៉ម ប៊ុនហេង បានប្រាប់ថា ស្រ្តីជនជាតិអង់គ្លេសរូបនេះ និងអ្នករួមដំណើរជាមួយគ្នា៤នាក់ទៀត បានធ្វើដំណើរតាមយន្តហោះចេញពីទីក្រុងឡុងដ៏ មកប្រទេសវៀតណាម បន្ទាប់មកកាលពីថ្ងៃទី៥ ខែមីនា ក៏បន្តដំណើរតាមនាវាចេញពីទីក្រុងហូជីមីញ មកដល់កំពង់ផែភ្នំពេញនាថ្ងៃទី៧ ខែមីនា។ នៅពេលមកដល់កំពង់ផែក្រុងភ្នំពេញនោះ ក្នុងចំណោមស្រ្តីជនជាតិអង់គ្លេសទាំង ៥នាក់ រួមដំណើរជាមួយគ្នា គឺមានតែ ៣រូប ប៉ុណ្ណោះយល់ព្រមឱ្យពិនិត្យសុខភាព ខណ: ២រូប ទៀតមិនព្រមឱ្យពិនិត្យសុខភាពឡើយដោយអះអាងថាមិនមានបញ្ហាសុខភាពអ្វីទេ។ បន្ទាប់មកអ្នកទាំងអស់នោះ ក៏បន្តដំណើរតាមនាវាពីក្រុងភ្នំពេញឆ្ពោះទៅសំចតនៅកំពង់ផែក្រុងកំពង់ចាម ប៉ុន្តែពេលនោះភាគីវៀតណាមក៏បានផ្តល់ដំណឹងមកភាគីកម្ពុជាក្នុងករណីសង្ស័យឆ្លងវីរុស Covid-19 លើ​ស្ត្រីជនជាតិអង់គ្លេសនៅលើនាវា ដូចនេះក្រសួងសុខាភិបាល បានចេញសកម្មភាពភ្លាមៗ រកស្ត្រីជនជាតិអង់គ្លេសនោះ មកពិនិត្យរកមេរោគនៅមន្ទីរពេទ្យរុស្សី ហើយលទ្ធផលនាល្ងាចថ្ងៃទី១០ ខែមីនា នេះក៏បង្ហាញថា មានភាពវិជ្ជមានវីរុស Covid-19។

ក្រសួងសុខភិបាលកម្ពុជា អះអាងថា ស្ត្រីជនជាតិអង់គ្លេសវ័យ ៦៥ឆ្នាំ នេះបានឆ្លងវីរុស Covid-19 ពេលធ្វើដំណើរតាមជើងយន្តហោះពីទីក្រុងឡុងដ៏ មកកាន់ប្រទេសវៀតណាម។ 

គួរបញ្ជាក់ថា នាពេលនេះមនុស្សនៅលើនាវាទាំង ៦៤នាក់ មិនត្រូវបានអនុញ្ញាតឱ្យចាកចេញពីនាវាឡើយ ដោយស្ថិតនៅក្រោមការតាមដានពិនិត្យសុខភាពយ៉ាងយកចិត្តទុកដាក់ពីក្រសួងសុខាភិបាលកម្ពុជា៕ ដោយ ៖ មករា

Tagged : /

ឆេះផ្សារនៅតំបន់ហ្គាហ្សា ស្លាប់ និងរបួស៧០នាក់

អគ្គីបានឆាបឆេះផ្សារមួយកន្លែង នៅតំបន់ហ្គាហ្សា (Gaza) បណ្ដាលឲ្យមនុស្សយ៉ាងហោចណាស់១០នាក់ស្លាប់ និង៦០នាក់ផ្សេងទៀតរងរបួស កាលពីថ្ងៃទី៥ ខែមីនា ឆ្នាំ២០២០។

ក្រសួងសុខាភិបាល បានថ្លែង កាលពីថ្ងៃទី៥ ខែមីនា ថា នៅក្នុងហេតុការណ៍គ្រោះអគ្គិភ័យនោះ បានបណ្ដាលឲ្យមនុស្សយ៉ាងហោចណាស់១០នាក់ស្លាប់ និង៦០នាក់រងរបួស។ ក្នុងចំណោមអ្នកស្លាប់ទាំងនោះ មាន៤នាក់ជាកុមារ និង៣នាក់ជាស្រ្ដី។ រីឯអ្នករបួស១៤នាក់​ ក្នុងចំណោមជនរងគ្រោះទាំងនោះ ស្ថិតក្នុងស្ថានភាពធ្ងន់ធ្ងរ។

យោងតាមសារព័ត៌មាន The National បានផ្សាយថា គ្រោះអគ្គិភ័យនេះត្រូវគេគិតថា វាអាចផ្តើម​ចេញពីការផ្ទុះកំប៉ុងហ្គាស នៅក្នុងហាងនំ Al Banna Bakery ស្ថិតក្នុងជំរំជនភៀសខ្លួន Nuseirat ។ ជំរំនេះមាន ជន ភៀសខ្លួនជាង ៨០.០០០នាក់។ នេះបើយោងតាមតួលេខរបស់ UNWRA ។

ប្រភពព័ត៌មានពីអ្នកនៅកន្លែងកើតហេតុ បានឲ្យដឹងថា មុនពេលកើតមាននូវគ្រោះអគ្គិភ័យនោះ​ ពួកគាត់បានឮស្នូសំឡេងផ្ទុះ។ លុះបន្ដិចក្រោយមក ស្រាប់តែមានភ្លើងឆាបឆេះ រាលដាលទៅកាន់ហាងផ្សេងៗទៀត រហូតបន្ដឆាបឆេះរាលដាលទៅកាន់រោងចក្រជាច្រើន និងរថយន្ដដែលចតនៅតាមផ្លូវ។ ភ្លាមៗនោះដែរ ប្រជាពលរដ្ឋបាននាំគ្នាជួយក្រុមពន្លត់អគ្គិភ័យបាញ់ទឹកពន្លត់ភ្លើង។ រីឯផ្សែងខ្មៅបានគ្របដណ្ដប់ទៅលើជំរំ របស់​ជនភៀសខ្លួន ដោយអាចមើលឃើញពីចម្ងាយរាប់គីឡូម៉ែត្រ។

លោក San Frontieres អ្នកនាំពាក្យ នៃអង្គការក្រៅរដ្ឋាភិបាល បាននិយាយថា អង្គការបានជួយដល់ជនរងគ្រោះដែលត្រូវបានបញ្ជូនមកសង្រ្គោះ នៅក្នុងមន្ទីរពេទ្យ។ ជំរំជនជាតិប៉ាឡេស៊ីន នៅហ្គាហ្សា​ មានទំហំ៣៦៥គីឡូម៉ែត្រការ៉េ លាតសន្ធឹងតាមសមុទ្រមេឌីទែររ៉ាណេ។ ជាមួយនឹងប្រជាពលរដ្ឋជិត ២លាននាក់​ ធ្វើឲ្យ Gaza Strip ក្លាយជាតំបន់មានប្រជាពលរដ្ឋច្រើនបំផុតមួយនៅលើពិភពលោក។

ដោយឡែកប្រទេសអ៊ីស្រាអែលបានបិទផ្លូវចូលទៅកាន់តំបន់នោះ ដោយលើកហេតុផលអំពីកង្វល់ខាងសន្តិសុខរបស់ខ្លួន ព្រោះមេដឹកនាំអ៊ីស្លាម ហាម៉ាស់ ធ្លាប់ធ្វើសង្គ្រាមជាច្រើនដងជាមួយនឹងអ៊ីស្រាអែល នាពេលកន្លងមក៕  ប្រែសម្រួលដោយ Nuon

Tagged : /

ខេត្តហ៊ូប៉ីគ្មានអ្នកឆ្លងវីរុស Covid-19 ក្នុងរយៈពេល២៤ម៉ោង

សារព័ត៌មានរ៉យទ័រ បានផ្សាយ កាលពីថ្ងៃទី៦ ខែមីនា ថា ក្នុងរយៈពេល២៤ម៉ោង នៅក្នុងខេត្តហ៊ូប៉ី លើកលែងតែទីក្រុងវូហាន មិនមានករណីឆ្លងវីរុសថ្មីម្នាក់ណាឡើយ។ នេះចាត់ទុកជារឿងដ៏ល្អបំផុត សម្រាប់ពលរដ្ឋរស់នៅក្នុងខេត្តនេះ។

ដោយឡែក នៅទីក្រុងវូហាន កាលពីថ្ងៃទី៥ ខែមីនា មានករណីឆ្លងថ្មីតែ១២៦នាក់ប៉ុណ្ណោះ ក្នុងរយៈពេល២៤ម៉ោង។ ចំណែកនៅទូទាំងប្រទេសចិនវិញ មានអ្នកឆ្លងតែ១៧នាក់ប៉ុណ្ណោះ។ បើសរុប​អ្នកឆ្លងនៅចិន មានចំនួន១៤៣នាក់ និងស្លាប់៣១នាក់តែប៉ុណ្ណោះ។

នៅក្នុងប្រទេសចិន មានអ្នកឆ្លង និងស្លាប់ថយចុះ ដោយសារតែចិនចាត់វិធានការយ៉ាងតឹងតែងបំផុត ដោយខេត្តហូប៉ីទាំងមូល មានពលរដ្ឋរហូតដល់ទៅ៥៨លាននាក់ ត្រូវកាត់ផ្តាច ទាំងស្រុង ពីខេត្តក្រុងផ្សេងៗទៀត។

ពលរដ្ឋត្រូវបានហាមប្រាមចេញក្រៅផ្ទះ ហើយក្នុងមួយគ្រួសារមានសិទ្ធិចេញក្រៅតែម្នាក់ប៉ុណ្ណោះ ដោយចេញបានតែ៣លើកក្នុងមួយថ្ងៃ ដើម្បីទិញសម្ភារ និងស្បៀងអាហារចាំបាច់។ រីឯអ្នកចេញទៅផ្សារ គឺត្រូវនៅឲ្យឆ្ងាយពីគ្នាយ៉ាងតិច១,៥ម៉ែត្រ មិនថាអ្នកស្គាល់ ឬមិនស្គាល់នោះឡើយ។ រថយន្តត្រូវបានហាមបើកបរនៅតាមដងផ្លូវនានា លើកលែងតែរថយន្តសង្គ្រោះបន្ទាន់តែប៉ុណ្ណោះ។

ដោយឡែកឱសថស្ថាននានា ក៏ត្រូវតែគត់ឈ្មោះអ្នកទិញ ទីតាំង កន្លែងរស់នៅ ហើយទិញថ្នាំអ្វី ក្អកឬក្តៅរងារ … ដើម្បីងាយស្រួល ក្នុងការតាមដានទប់ស្កាត់។ ការអនុម័តច្បាប់យ៉ាងតឹងតែងបែបនេះ ទើបចិនអាចទប់ស្កាត់ការឆ្លងរាលដាល នៃវីរុសរលាកផ្លូវដង្ហើមថ្មីយ៉ាងមានប្រសិទ្ធភាពបំផុត៕ ប្រែសម្រួលដោយ៖MEO

Tagged : / /

សិស្សសាលា២នាក់ ត្រូវចោរខ្វេះកាបូបទាំងកណ្តាលថ្ងៃ នៅផ្សារទំនើបស្ទឹងមានជ័យថ្មី

រាជធានីភ្នំពេញ៖ យុវតី២នាក់ ត្រូវក្រុមចោរជំនាញដាក់ថ្នាំសណ្តំ យកលុយទៅបាត់ចំនួន៥០០ដុល្លារទាំងកណ្តាលថ្ងៃ ក្នុងផ្សារទំនើបស្ទឹងមានជ័យថ្មី។

ហេតុការណ៍នេះ កើតឡើងកាលពីវេលាម៉ោង១២និង៣០នាទីរសៀល ថ្ងៃទី៦ ខែមីនា ឆ្នាំ២០២០ ស្ថិតនៅក្នុងផ្សារទំនើបស្ទឹងមានជ័យថ្មី ក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។

តាមសម្តីយុវតីរងគ្រោះខាងលើបានឲ្យដឹងថា មុនពេលកើតហេតុ ឪពុករបស់នាងបានប្រើឲ្យនាងយកមាសមកលក់នៅផ្សារទំនើបស្ទឹងមានជ័យថ្មី។ ខណៈពេលលក់រួចរាល់ហើយ យុវតីខាងលើបានវេរលុយចំនួន៩០០ដុល្លារទៅឲ្យឪពុក នៅសល់លុយចំនួន៥២០ដុល្លារទៀត ទុកក្នុងកាបូបស្ពាយនៅខាងក្រោយ។ 

បន្ទាប់មកយុវតីរងគ្រោះ ក៏បានបបួលគ្នាចុះមកញាំអីនៅជាន់ខាងក្រោម ស្របពេលនោះក៏លេចមុខជនសង្ស័យជាស្ត្រី២នាក់ បានដើរមកក្បែរហើយដើរជាន់ជើងនាង ពេលនោះយុវតីខាងលើហាក់បីដូចជាដឹងថាបាត់លុយ ទើបរត់តាមជនសង្ស័យស្រែកថាចោរៗ មួយសន្ទុះក្រោយមក ក៏បាត់ស្មារតីនិយាយលែងចេញ ទើបយុវតីម្នាក់ទៀតដែលជាមិត្តភក្តិទៅជាមួយគ្នា បានខលប្រាប់ឪពុកម្តាយយុវតីរងគ្រោះ ដឹកយុវតីខាងលើដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសង្កាត់ស្ទឹងមានជ័យទី១ ជួយអន្តរាគមន៍ និងស្រាវជ្រាវចាប់ជនដៃស្អិតយកមកផ្តន្ទាទោសតាមផ្លូវច្បាប់៕ សួងសាម

Tagged : /

ទេព បូព្រឹក្ស និង​ ជី ដេវិត ចេញ​បទប្រពៃណី​ថ្មី​ត្រៀម​ចូលឆ្នាំ​ខ្មែរឡើង​ឡូយ​អស់ទាស់

ឲ្យ​តែ​ពេលបុណ្យ​ចូលឆ្នាំ​ប្រពៃណី​ខ្មែរកាន់​តែ​កៀក​មក​ដល់ គ្រប់​ផលិត​កម្ម និងតារាចម្រៀង​ឯក​ជន​តែងតែ​មាន​បទចម្រៀង​ប្រពៃណី​គ្រប់ចង្វាក់ត្រៀម​សម្រាប់​បង​ប្អូន​ប្រជាជន​ខ្មែរ​រាំលេង​សប្បាយនាឱកាស​ដ៏​រីករាយ​។

ឲ្យ​តែ​ពេលបុណ្យ​ចូលឆ្នាំ​ប្រពៃណី​ខ្មែរកាន់​តែ​កៀក​មក​ដល់ គ្រប់​ផលិត​កម្ម និងតារាចម្រៀង​ឯក​ជន​តែងតែ​មាន​បទចម្រៀង​ប្រពៃណី​គ្រប់ចង្វាក់ត្រៀម​សម្រាប់​បង​ប្អូន​ប្រជាជន​ខ្មែរ​រាំលេង​សប្បាយនាឱកាស​ដ៏​រីករាយ​។

ក្នុង​នោះទេព បូព្រឹក្ស និង​ ជី ដេវិត ក៏​ទើប​តែ​បាន​បង្ហោះ​ស្នាដៃថ្មី​របស់​ខ្លួន​​នៅ​លើ​ Facebook Page ជា​ផ្លូវ​ការ ដែល​ត្រៀម​សម្រាប់​ចូលឆ្នាំ​ប្រពៃណីខ្មែរផងដែរ។ បទចម្រៀង​បែបចង្វាក់ប្រពៃណីដែល​មាន​ចំណង​ជើង​ថា”អួតសាហាវ”កំពុង​តែ​អង្រួន​ចិត្ត​អ្នក​គាំទ្រ​មិន​ធម្មតា។ មិន​ត្រឹម​តែ​ពីរោះ​នោះទេ សូម្បី​តែ​វីដេអូចម្រៀង​អ្នក​ទាំង​ពីរ​ក៏​បាន​រំលេច​នៅ​សម្លៀក​បំពាក់​ខែ្មរ​ដ៏​ស្រស់​ផូរផង់ ឃើញ​ហើយ​លង់​ចិត្ត​ដក​មិន​រួច​តែ​ម្ដង។

ស្នាដៃថ្មី​រួម​គ្នា​រវាងគូស្នេហ៍​ល្អូកល្អើន​មួយ​គូនេះ ទទួល​បាន​ការ​ចូល​ទស្សនា​រាប់ម៉ឺនដង ក៏​ដូចជា​ចែករំលែក​តៗគ្នា​រាប់ពាន់​ដង ក្នុង​រយៈ​ពេល​មិន​ដល់​មួយ​ថ្ងៃ​ផង។

លើស​ពី​នេះ​អ្នក​ទស្សនា​ជា​ច្រើន​ក៏​បាន​បញ្ចេញ​មតិ​សរសើរ​មិន​ដាច់​ពី​មាត់​ថា​មួយ​បទ​នេះ​ពិត​ជា​ពីរោះ ហើយ​ពិត​ជា​ស្រឡាញ់​ពេញ​ចិត្ត​ជា​ខ្លាំងសម្រាប់​បទ​បែប​ប្រពៃណី​ទុក​រាំ​កម្សាន្ត​នាពេល​ចូលឆ្នាំ​បែប​នេះ៕

អត្ថបទ៖ ផេង ផលធិតា 

Tagged : / /

ជើងខ្លាំងបោកប្រាស់ ត្រូវពលរដ្ឋចាប់ក្របួចនៅខណ្ឌពោធិសែនជ័យ

ភ្នំពេញ៖ ជើងខ្លាំងខាងបោកប្រាស់ម្នាក់ ត្រូវពលរដ្ឋក្របួចបាន រីឯម្នាក់ទៀតរត់រួចខ្លួនបាត់ នៅម៉ោង ១ និង ៣០នាទី រសៀលថ្ងៃទី ៦ ខែ មីនានេះ ត្រង់ចំណុចភូមិជង្រុក សង្កាត់ត្រពាំងក្រសាំង ខណ្ឌពោធិសែនជ័យ រាជធានីភ្នំពេញ។ 

ពលរដ្ឋនៅកន្លែងកើតហេតុបានឲ្យដឹងថា ជនសង្ស័យឈ្មោះ សែម បូរ៉ា ភេទប្រុស អាយុ ៥០ឆ្នាំ មុខរបរមិនពិតប្រាកដ ស្នាក់នៅផ្ទះជួល ភូមិដំណាក់ សង្កាត់គោកឃ្លាង ខណ្ឌសែនសុខ។ 

ជនងរងគ្រោះឈ្មោះ ឆាន់ ស្រីនិច ភេទស្រី អាយ ២៥ឆ្នាំ មុខរបរកម្មការនីរោងចក្របានឲ្យដឹងថា នៅម៉ោង ១១ និង ៣០នាទី ព្រឹកថ្ងៃទី០៦ ខែមិនា ពេលនាងហូបបាយរួចដើរទៅរោងចក្រវិញ តែមុននឹងចូល ឆ្លៀតដើរទៅកន្លែងលក់ឃ្នាបសក់ ខាងមុខរោងចក្រ។ ពេលនោះក៏បានជួបស្ត្រីជនសង្ស័យម្នាក់ដើរមកខ្សឹបប្រាប់ថា មានគេជ្រុះកញ្ចប់មាស លុយ ភ្លាមនោះក៏ស្រាប់តែស្ត្រីជនសង្ស័យម្នាក់ទៀតមកដល់ ប្រាប់ថាកុំមាត់ រើសបានទុកចែកគ្នា ហើយល្បួងនាំនាងចេញទៅភូមិជង្រុក ល្បួងចែកទ្រព្យ ដោះយកគ្រឿងអលង្ការអស់ពីខ្លួន។ 

ជនរងគ្រោះបន្តថា ក្រោយពីជនសង្ស័យលួងយកទ្រព្យអស់ទើបដឹងថា ការប្តូរគ្នានោះនាងទទួលបានតែរបស់កាឡៃ ទើបស្រែកយំស្ទុះចាប់កន្ទុយម៉ូតូជាប់ពេលជនសង្ស័យបម្រុងជិះរត់គេចខ្លួន ផ្អើលអ្នកភូមិ ចាប់បានម្នាក់ រីឯបក្ខពួករត់រួចបាត់អស់។ នាងបន្តថា បាត់បង់ខ្សែកប្លាទីន ទម្ងន់៣ជី តម្លៃ២១៥ដុល្លា កងដៃមួយឈុត ២៥កង តម្លៃ៩៣៥ដុល្លា ចិញ្ចៀនប្លាទីន តម្លៃ១២០ដុល្លា សរុប១២៧០ដុល្លា។ ក្រោយកើតហេតុទើបឃើញ សមត្ថកិច្ចមកដកហូតម៉ូតូស្មាស់មួយគ្រឿង ពណ៌ខ្មៅ ពាក់ស្លាកលេខ ភ្នំពេញ 1BO-0222 ជាមធ្យោបាយរបស់ជនសង្ស័យ ៕ ដោយ៖ សុភាព

Tagged : /